සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
රජය විසින් නැවත භාරගත් බංගලා නිවාස 6ක් නාමික කුලියක් මත තාවකාලික පදනමින් ආයතන කිහිපයක් සඳහා වෙන් කර ඇති බව රාජ්‍ය පරිපාලන අමාත්‍ය චන්දන අබේරත්න පාර්ලිමේන්තුවේදී ප්‍රකාශ කළේය.
මේ සම්බන්ධව පාර්ලිමේන්තු මන්ත්‍රී චාමර සම්පත් දසනායක විමසූ ප්‍රශ්නයකට පිළිතුරු දෙමින් අමාත්‍යවරයා සඳහන් කළේ, වෙන් කළ නිවාස , අල්ලස් හෝ දූෂණ චෝදනා විමර්ශන කොමිෂන් සභාවට: නිවාසයක්, පොලිස් දෙපාර්තමේන්තුවට: නිවාසයක්, අධිකරණ අමාත්‍යාංශයේ විශේෂ අධිකරණ පිහිටුවීම සඳහා: නිවාස හතරක්, වෙන්කර ඇති බවයි.
එමෙන්ම, කථානායකවරයාට සහ නියෝජ්‍ය අමාත්‍යවරුන් හත් දෙනෙකුට ඔවුන්ගේ වැටුපෙන් අදාළ නිවාස කුලිය අයකර ගනිමින් රජයේ නිල නිවාස ලබාදී ඇති බවද අමාත්‍යවරයා පැවසීය.
අමාත්‍යවරයාගේ ප්‍රකාශයට ප්‍රතිචාර දක්වමින් චාමර සම්පත් මන්ත්‍රීවරයා චෝදනා කළේ, “අමාත්‍යවරුන්ගේ නිල නිවාස ගන්නේ නැහැ කියලා රටට කිව්වා. කැබිනට් අමාත්‍යවරු පාවිච්චි කරපු රජයේ ඒවා කාටවත් දෙන්නේ නැහැ කියලා කිව්වා,” යනුවෙනි.
මන්ත්‍රීවරයා අවධාරණය කළේ, නියෝජ්‍ය අමාත්‍යවරුන් ඇතුළු පිරිසගේ වැටුපෙන් කුලිය කැපෙනවා නම්, විපක්ෂයේ ඕනෑම කෙනෙකුටත් කුලියෙන් කැපීමට නිවාස ලබාදීමට හැකි බවයි.
තවද, රජය මින් පෙර එම නිවාස සංචාරක හෝටල්වලට හෝ වෙනත් ප්‍රයෝජනයකට යොදා ආදායම් උපයන බවට පැවසුවද, නිවාස වසා තැබීම නිසා ඒවා කඩා වැටෙන තත්ත්වයට පත්ව ඇති බවට ඔහු පෙන්වා දුන්නේය.
ඊට ප්‍රතිචාර දැක්වූ අමාත්‍ය චන්දන අබේරත්න , කිසිඳු අමාත්‍යවරයෙකුට නිල නිවාස දී නොමැති බවත්, නිවාස වෙන් කිරීම සම්බන්ධයෙන් අදාළ කමිටු නිර්දේශ අනුව කටයුතු කරමින් සිටින බවත් පැවසීය.
කෙසේ වෙතත්, විපක්ෂයේ මන්ත්‍රීවරයෙක් නිවාසයක් ඉල්ලා සිටියහොත් එය “සලකා බලා සුදුසු නම් පමණක්” නිවාස ලබාදීම සඳහා කටයුතු කරන බවට අමාත්‍යවරයා පෙන්වා දුන්නේය.
අවසානයේදී චාමර සම්පත් මන්ත්‍රීවරයා ඉල්ලා සිටියේ, නිල නිවාස වහලා තබා දැන් මාස 13ක් වන බැවින්, තවදුරටත් කමිටු නිර්දේශ එනතෙක් බලා නොසිට නිවාස කඩිනමින් ප්‍රයෝජනයට ගන්නා ලෙසයි.
0 Comments