සම්පූර්ණ පුවත කියවන්න පහත "පුවත කියවන්න" බොත්තම ඔබන්න..
පොලිස්පතිවරයාගේ ඉල්ලීම මත ජ්‍යෙෂ්ඨ නියෝජ්‍ය පොලිස්පති ලලිත් පතිනායක ව පොලිස් “පරිපාලන” භාර ධූරයෙන් ඉවත් කිරීම සම්බන්ධව හිටපු අමාත්‍ය උදය ගම්මන්පිල අද (03) කැඳවූ මාධ්‍ය හමුවකදී දැඩිව විවේචනය කළේය .
ඔහු පෙන්වා දුන්නේ අල්ලස් කොමිසම ජනතාව දැනුවත් කරන අයුරින්ම, පතිනායක මහතා කර ඇත්තේ රාජ්‍ය ආයතනයක සිදුවන දූෂණයක් පිළිබඳ තොරතුරු ලබා දීමෙන් පුරවැසියෙකුගේ යුතුකම ඉටු කිරීම බවයි.
පොලිස්පතිවරයාගේ ඉල්ලීම මත පොලිස් කොමිසම විසින් පතිනායක මහතා පරිපාලනය භාර ජ්‍යෙෂ්ඨ නියෝජ්‍ය පොලිස්පති ධුරයෙන් ඉවත් කර තිබෙන අතර, ඔහුට එරෙහි චෝදනාව වන්නේ ‘පොලිසියේ අතිශය රහසිගත අභ්‍යන්තර තොරතුරු බාහිර පාර්ශවයන්ට ලබා දීම’ යි.
“ඒ යුතුකම ඉටු කළ හේතුවෙන් දඬුවම් ලබනවා නම්, මින් ඉදිරියට කිසිවකු රටේ සිදුවන දූෂණ හෙළි කිරීම සඳහා කටයුතු කරන එකක් නෑ. මේක අතිශයින්ම භයානක පූර්වාදර්ශයක්. මේකට දැන්ම තිත තැබුවේ නැතිනම් අනාගතයේදී ලංකාවේ දූෂණයක් සොයන්න බැරි වෙනවා,” ගම්මන්පිල මහතා පැවසීය.
ගම්මන්පිල මහතා පැහැදිලි කළේ, මෙම සිද්ධියට මුලික වී ඇත්තේ පොලිසියට බැනියම් මිල දී ගැනීමේදී පිරිවිතර සම්පූර්ණ නොකළ ඉහළ මිලක් ඉදිරිපත් කළ සැපයුම්කරුවෙකුට ටෙන්ඩරය පිරිනැමීම සම්බන්ධයෙන් පොලිස්පතිවරයාට එල්ල වූ චෝදනාව බවයි.
මිල වැඩි සැපයුම්කරු අඩුපාඩු සකස් නොකරම බැනියම් 175,000ක් සැපයූ විට, නියෝජ්‍ය පොලිස්පති ප්‍රියන්ත චන්ද්‍රසිරි එය භාර ගැනීම ප්‍රතික්ෂේප කළ අවස්ථාවේදී, පොලිස්පතිවරයා ඔහුට බැණ වැදී භාර ගන්නා ලෙස නියෝග කළ බවට චෝදනා එල්ල විය.
ජ්‍යෙෂ්ඨ නියෝජ්‍ය පොලිස්පති ලලිත් පතිනායක මාධ්‍යවේදියෙකුට මෙම තොරතුරු ලබා දුන්නේ, ඒවා සමාජ මාධ්‍යවල පළකර පොලිස්පතිට මඩ ගැසීමට නොව, අල්ලස් කොමිසමට පැමිණිලි කිරීමට බවද ගම්මන්පිල මහතා අවධාරණය කළේය.
“පතිනායක ඉටු කරලා තිබෙන්නේ විස්ල් බ්ලෝවර් (නළා පිඹින්නාගේ) රාජකාරිය, දූෂණයක් වන විට ඒ ගැන අල්ලස් කොමිසමට පැමිණිලි කරන එක. එවැනි අය රැක ගැනීමට දූෂණ විරෝධී පනතේ විධිවිධාන තිබෙනවා.”
ඔහු වැඩිදුරටත් කියා සිටියේ නීතිය ක්‍රියාත්මක කළ යුත්තේ පතිනායකට එරෙහිව නොව, දුරකථන සංවාදවල හඬ පට එළියට දමා දූෂණ හෙළි කළ නිලධාරියා අවදානමක දැමූ පුද්ගලයින්ට එරෙහිව බවයි.
පොලිස් ලිපිගොනු හෙළිදරව් කිරීම පිළිබඳ දඬුවම් දෙනවා නම්, මුලින්ම පොලිසිය භාර ලේකම් රවි සෙනෙවිරත්නට දඬුවම් කළ යුතුව තිබූ බවට ගම්මන්පිල මහතා චෝදනා කළේය. සෙනෙවිරත්න මහතා 2024 දී තමන්ට එරෙහිව තිබූ රහස් පොලිස් ලිපිගොනු තොරතුරු නඩුවකට ගොනු කරමින් හෙළි කළේ තමන්ගේ ගැලවීම සඳහා බවත්, එහෙත් පතිනායක මහතා ලිපිගොනු හෙළිදරව් කරන්නේ දූෂණයක් හෙළිදරව් කිරීමට බවත් ඔහු පෙන්වා දුන්නේය.
“චෝදනාවෙන් නිදහස් වෙනවා වෙනුවට චෝදනා කරන කෙනාට දඬුවම් කිරීමෙන් පේන්නේ පොලිස්පතිතුමාගේ කිල්ලෝටයෙත් හුනු තිබෙන බවයි.”
පොලිස්පති ධුරයට නොගැළපෙන ලෙස කටයුතු කිරීම සම්බන්ධයෙන් ගම්මන්පිල මහතා පොලිස්පතිවරයාට “ඇතුළු ගිනි පිටතට නොදෙව” යනුවෙන් විශාඛාවට ධනංජය සිටු පියාණන් දුන් අවවාදය සිහිපත් කළේය.
දේශපාලන තත්ත්වය පිළිබඳ අදහස් දක්වමින් ගම්මන්පිල මහතා, නොවැම්බර් 21 දා නුගේගොඩ පැවැත්වෙන ආණ්ඩු විරෝධී රැස්වීම සම්බන්ධයෙන් විපක්ෂයේ ඇතැම් පක්ෂ පවත්වන ප්‍රතිපත්තිමය මතභේද විවේචනය කළේය.
මේ තිබෙන්නේ සාම්ප්‍රදායික ආණ්ඩුවක් නොව ‘ත්‍රස්තවාදීන්ගේ ආණ්ඩුවක්’ බවත්, ඔවුන් ප්‍රජාතන්ත්‍රවාදීව බලය ආපසු භාර නොදෙන බවට ආරක්ෂක නියෝජ්‍ය අමාත්‍යවරයා සහ ජනාධිපතිවරයා ප්‍රකාශ කර ඇති බවත් හෙතෙම සිහිපත් කළේය .
“බලය රැක ගැනීම වෙනුවෙන් ලක්ෂයක් වුණත් මරන්න ලැහැස්තියි” යනුවෙන් නගරාධිපතිවරයෙකු ප්‍රකාශ කිරීම මෙහි භීෂණයේ තරම පෙන්වන බවත් ඔහු වැඩිදුරටත් සඳහන් කළේය .
ඒ අනුව, 1940 දශකයේදී ජර්මනියේ හිට්ලර්ගේ ෆැසිස්ට්වාදය පරාජය කිරීමට ලෝක බලවතුන් (ධනවාදී ඇමරිකාව, සමාජවාදී සෝවියට් දේශය සහ සමාජ ප්‍රජාතන්ත්‍රවාදී එක්සත් රාජධානිය) ප්‍රතිපත්තිමය වෙනස්කම් පසෙක තබා මිත්‍ර සංධානයක් ගොඩනැගුවා සේ, ශ්‍රී ලංකාවේ විපක්ෂය ද පෞද්ගලික අමනාපකම් සහ ප්‍රතිපත්තිමය කෝන්තර පසෙක තබා, භීෂණයට එරෙහිව සමගි විය යුතු බව ඔහු අවධාරණය කළේය.
0 Comments